من ألبوم غنائي للأطفال من إنتاج شركة النور للإنتاج الإسلامي
م=مطرب
ك=كورال اطفال
م:عارفين إيه هو الحيوان
ك: طبعا مش زي الإنسان
م: لا بيتكلم ولا بيذاكر
ك: لكن عنده لسان وودان
م:قطة وبطة وكلب كبير
ك:دبة ووقعت يوم في البير
م: والحيوان ده قصصه كتير
ياما اتقالت في القرآن
*****
م: شوفتوا الفيل؟
ك: ماله الفيل؟
م: وزنه تقيل
ك:بس جميل
م:هاتوا المصحف يالـلا تعالوا
نقرا حكايته من القرآن
م: كان فيه مرة ملك متجبر
لم جيوشه ولم العسكر
فكر إنه يهد الكعبة
بعد ما خطط بعد ما دبر
صحي الفيل فلفول من نومته
علشان يضربها بزلومته
لكن ربنا كان مستني
علشان يرميهم بحجارته
كل حجارة..قد عمارة...نزلت فوقهم زي البمبة
جريوا وهربوا.. بعد ماتعبوا..
والفيل ماقدرشي علي الكعبة
ك:الله أكبر.. الله اكبر
****
م: شوفتوا الحوت؟
ك: ماله الحوت؟
م:بين الموج
ك: عمال بيفوت
م:هاتوا المصحف يالـلا تعالوا
نقرا حكايته من القرآن
م: كان النبي يونس في المية
ما بين الحيا ومابين الموت
قبل ما يغرق بص في ثانية
قرب منه وبلعه الحوت
وفي بطن الحوت التختوخ
كان م الجوع تعبان بيدوخ
دعي ربنا علشان يحميه
من خياشيمه وم البطروخ
وفاتوا تلات أيام
والحوت جاله زكام
عطس الحوت عطسة كبيرة
طار من بقه خرج في سلام
ك: الله أكبر.. الله أكبر
*****
م: شفتوا كمان؟
ك: طب ايه كمان؟
شفتوا التعبان؟
ك: ماله التعبان؟
م:هاتوا المصحف يالـلا تعالوا
نقرا حكايته من القرآن
م: كان فيه مرة ملك مجنون
حتي الناس سموه فرعون
والنبي موسي حاول يهديه
لإله واحد خلق الكون
بس الفرعون أتحداه
قاله أنا برضه ملك وإله
وجاب السحرة اللي ف مملكته
جلا جلا جلا شمهورش تاه
كل ما ساحر يرمي عصايته
يفتكروها الناس تعبان
والفرعون يضحك علي موسي
وسنانه المكسورة تبان
قال لموسي تعالي يا موسي
والا وقعت في ورطه وحوسه؟
النبي موسي قال بسم الله
برضه عصايته بقت تعبان
تعبان وحشي ووزنه مهول
راسه كبيرة وقد الغول
كَل كٌل التعابين التانية
والفرعون واقف مشلول
ك: الله أكبر.. الله أكبر
****
م: شوفتوا النملة
ك: مالها النملة
م: عملت عاملة
ك: إنما عاملة
م:هاتوا المصحف يالـلا تعالوا
نقرا القصة من القرآن
م: كان النبي سليمان وجيوشه
ماشين بيدوسوا علي الأرض
مين يقدر في الدنيا يحوشه
جيشه كبير بالطول والعرض
سمعت نملة صوت رجليهم
خافت علي صاحباتها النمل
دول هيدوسوا ويعدوا عليهم
أصل النمل ده قد الرمل
سبحان الله الرحمن
أنعم نعمه علي سليمان
خلاه بيتكلم وبيفهم
لغة الإنسان والحيوان
قال لجيشه هَدوا شويه
ودوسوا ع الأرض بقي بحنية
علشان النمل المسكين
يجري لبيته مايشوفش أذية
ك: الله أكب.. الله أكبر
****
م: القرأن مليان حكايات
ك:نعرف منه حاجات وحاجات
م:نبدأ يومنا بآيات منه
ونختم يومنا كمان بأيات
ك: نبدأ يومنا بآيات منه
ونختم يومنا كمان بآيات
م: الله أكبر..الله أكبر
ك: الله أكبر....الله أكبر
رااااااااااااااااااااااائع
ردحذفالله على الجمال . فين الباقى
ردحذف